Lehengo urteko esperientziari jarraipena eman asmoz, aurten ere Santiagoko Bidearen inguruan “Hausturak”-eko 9. egonaldia proposatu genuen Ekainaren 2-tik, 8-ra. Iaz Orreagatik-Lizarrara egindako bideari segida emanez, Lizarratik-San Juan de Ortegara (Burgos) hain zuzen ere. Egonaldi hau, muga-gaindiko “Lazos-Liens-Loturak” (Poctefa-Feder) proiektuaren barruan kokatzen da eta Gipuzkoako, Nafarroako, Arabako eta Pirinio Atlantikoko gazteei haustura egonaldi honetan partehartzeko eskaintza zabaldu zaie. Azkenik, Gipuzkoa, Nafarroa eta Arabako gazteek parte hartu dute. Egonaldiaz gain, nabarmendu behar da, honen eragina, hautagaiekin burutu ohi dugun lehen elkarrizketan hasi eta ebaluaketa saio ezberdinekin bukatzen dela. Azkenik 6 gaztek parte hartzen badute, honek esan nahi du elkarrizketatutakoak gehiago ere izan zirela, eta ekintza horrek euren bizitzetan zer edo zer “mugitzeko” balio izan zuela.
Lehenengo pausuak burutu ondoren (elkarrizketak, hautagaien aukeraketa egin, gizarte-heziketa kontratua sinatu, erosketak egin eta taldearekin prestaketa-ekintzak burutu), 6 gazteak eta 2 hezitzaileek Lizarran egin genuen zita egonaldiari hasiera emanez. Behar diren akreditazioak egin eta behin bideari ekin eta gero, bertako martxa, ohiturak eta abar ezagutzen joan ginen; erromesekin, ostatu ematen zigutenekin eta herritarrekin harremanetan jartzeko aukera eta beraiekin hitz eginez esperientzia eta ikuspegiak elkarbanatzeko parada izan genuen. Bizitzen ari ginen esperientzia hau guretzako bakarrik gera ez zedin, Facebook-en ere kronikak idatzi genituen eta bide batez gurekin batera bidea “egiteko” aukera zabaldu. Aurreko urteko egonaldiarekin alderatuz, bi egun gehiago eman izanak, “Bidean” (eta honek suposatzen duenean) sakonago murgiltzeko aukera eman zigun, talde bizitza aberastuz era berean. Halere, nekeak-neke, honi jarraipena emateko gogoa areagotu zitzaigun partaideei. Azkeneko egunean, Burgos-eko San Juan de Ortegan eman genion amaiera azken etapari. |